Aarige Vadhuvaade ಆರಿಗೆ ವಧುವಾದೆ ಅಂಬುಜಾಕ್ಷಿ

ಆರಿಗೆ ವಧುವಾದೆ ಅಂಬುಜಾಕ್ಷಿ ।

ಕ್ಷೀರಾಬ್ಧಿ ಕನ್ನಿಕೆ ಶ್ರೀಮಹಾಲಕುಮಿ ॥

ಶರಧಿ ಬಂಧನ ರಾಮಚಂದ್ರ ಮೂರುತಿಗೋ

ಪರಮಾತ್ಮ ಅನಂತ ಪದ್ಮನಾಭನಿಗೋ ।

ಸರಸಿಜನಾಭ ಜನಾರ್ಧನ ಮೂರುತಿಗೋ

ಎರಡು ಹೊಳೆಯ ರಂಗ ಪಟ್ಟಣ ವಾಸಗೋ ॥

ಚಲುವ ಬೇಲೂರು ಚೆನ್ನಿಗರಯನಿಗೋ

ಕೆಳದಿ ಹೇಳು ಉಡುಪಿಯ ಕೃಷ್ಣರಾಯಗೋ ।

ಇಳೆಯೊಳು ಪಂಢರಪುರ ವಿಠಲೇಶಗೋ

ನಳಿನಾಕ್ಷಿ ಪೇಳು ಬದರೀನಾರಯಣಗೋ ॥

ಶರಣಾಗತರ ಪೊರೆವ ಶಾರಂಗ ಪಾಣಿಗೊ

ವರಗಳ ನೀವ ಶ್ರೀ ಶ್ರೀನಿವಾಸನಿಗೊ ।

ಕುರುಕುಲಾಂತಕ ನಮ್ಮ ರಾಜಗೋಪಾಲಗೋ

ಸ್ಥಿರವಾಗಿ ಪೇಳು ಪುರಂದರವಿಠಲಗೋ ॥