Ennolu Vaasavagi ಎನ್ನೊಳು ವಾಸವಾಗಿ ದಾಸನ ಮಾಡಿಕೋ

ಎನ್ನೊಳು ವಾಸವಾಗಿ ದಾಸನ ಮಾಡಿಕೋ |

ಶ್ರೀಕರ ಶುಭಕರ ಅಭಯಂಕರ ||

ನೋಟ ಬೀರಿದರೂ ಕಾಣದೆ ನಿಸ್ಸೀಮ

ಕೇಳ ಹೋದರೆ ಅಗಮ್ಯ ನಿಗಮಾಂತ |

ನುತಿತತಿಗಳಿಗೆ ನಿಲುಕದ ನಿರವಧಿಕ ಗುಣಾರ್ಣವ

ಕೋಶ ಕೋಶದಲೂ ಆಕಾಶವ ತೋರಿದ ಕಿಶೋರ ||

ಬ್ರಹ್ಮಾಂಡದೊಳಗೆಲ್ಲ ನಿನ್ನಿಂದಲೆ ಸೃಜನ

ಪಿಂಡಾಂಡದೊಳಗೆಲ್ಲ ನಿನ್ನಿಂದಲೆ ಬೆಳಕು |

ಅಂಗಾಂಗಗಳೊಳಗೆಲ್ಲ ನಿನ್ನಿಂದಲೆ ಚೈತನ್ಯ

ಎನ್ನ ಪ್ರಾದೇಶ ಮಾತ್ರದೊಳು ನಿನಗಿಲ್ಲವೆ ಅವಕಾಶ ||

ಶಿಲೆಯಲ್ಲಿ ಕಲೆಯಾಗಿ ಅರಳಿ ಮೆರೆದೆ

ಕುಂಚದಲಿ ಚಿತ್ತಾರವಾಗಿ ಹೊಮ್ಮಿ ಕರ್ಷಿಸಿದೆ |

ತಾಳೆಗರಿಯಲಿ ಜ್ಞಾನವಾಹಿನಿಯಾಗಿ ಪ್ರವಹಿಸಿದೆ

ಎನ್ನ ಹೃತ್ಕಮಲವೊಂದೆ ಬರಿದಾಗಿ ತೋರಿತೆ ||

ರೂಪಲಾವಣ್ಯಗಳ ಕಾರಣರೂಪಿಯಿವ

ಬಿಂಕ ವೈಯ್ಯಾರಗಳನಿತ್ತ ವಿಧಾತೃ ನೀ |

ಸಾವಕಾಶದಿ ತನು ಮನ ವ್ಯಾಪಿಸಿದ ವಿಶ್ವಾತ್ಮ ನೀನು

ಸತ್ಯಾತ್ಮಸುಧೆಯಲಿ ರತನಾಗಿಸಿದ ಸರ್ವಾತ್ಮ ರತುನ ನೀನು ||