Ollano Hari Kollano ಒಲ್ಲನೋ ಹರಿ ಕೊಳ್ಳನೋ

ಒಲ್ಲನೋ ಹರಿ ಕೊಳ್ಳನೋ |

ಎಲ್ಲ ಸಾಧನವಿದ್ದು ತುಳಸಿಯಿಲ್ಲದ ಪೂಜೆ ||

ಸಿಂಧು ಶತಕೋಟಿ ಗಂಗೋದಕವಿದ್ದು

ಗಂಧ ಸುಪರಿಮಳ ವಸ್ತ್ರವಿದ್ದು |

ಚೆಂದುಳ್ಳ ಆಭರಣ ಧೂಪದೀಪಗಳಿದ್ದು

ಬೃಂದಾವನ ಶ್ರೀ ತುಳಸಿ ಇಲ್ಲದ ಪೂಜೆ ||

ದಧಿಕ್ಷೀರ ಮೊದಲಾದ ಅಭಿಷೇಕಗಳಿದ್ದು

ಮಧುಪರ್ಕ ಪಂಚೋಪಚಾರವಿದ್ದು |

ಮುದದಿಂದ ಮುದ್ದು ಶ್ರೀ ಕೃಷ್ಣ ಪೂಜೆಗೆ

ಸದಮಲಳಾದ ಶ್ರೀ ತುಳಸಿ ಇಲ್ಲದ ಪೂಜೆ ||

ಮಂತ್ರ ಮಹಾಮಂತ್ರ ಪುರುಷಸೂಕ್ತಗಳಿದ್ದು

ತಂತು ತಪ್ಪದೆ ತಂತ್ರಸಾರವಿದ್ದು |

ಸಂತತ ಸುಖಸಂಪೂರ್ಣನ ಪೂಜೆಗೆ

ಅತ್ಯಂತಪ್ರಿಯಳಾದ ತುಳಸಿ ಇಲ್ಲದ ಪೂಜೆ ||

ಕಮಲಮಲ್ಲಿಗೆ ಜಾಜಿ ಸಂಪಿಗೆ ಕೇದಿಗೆ

ವಿಮಲಘಂಟೆ ಪಂಚವಾದ್ಯವಿದ್ದು |

ಅಮಲಪಂಚಭಕ್ಷಪರಮಾನ್ನಗಳಿದ್ದು

ಕಮಲನಾಭನು ತನ್ನ ತುಳಸಿ ಇಲ್ಲದ ಪೂಜೆ ||

ಪೂಜೆಯ ಮಾಡದೆ ತುಳಸಿ ಮಂಜರಿಯಿಂದ

ಮೂಜಗದೊಡೆಯ ಮುರಾರಿಯನು |

ರಾಜಾಧಿರಾಜನೆಂಬ ಮಂತ್ರಪುಷ್ಪಗಳಿಂದ

ಪೂಜಿಸಿದರು ಒಲ್ಲ ಪುರಂದರವಿಠ್ಠಲ ||