Govinda Narayana ಗೋವಿಂದ ನಾರಾಯಣ

ಗೋವಿಂದ ನಾರಾಯಣ

ಗೋವಿಂದ ನಾರಾಯಣ |

ಗೋವರ್ಧನ ಗಿರಿಯನೆತ್ತಿದ

ಗೊವಿಂದ ನಮ್ಮ ರಕ್ಷಿಸೈ ||

ಮಂಚ ಬಾರದು ಮಡದಿ ಬಾರಳು

ಕಂಚುಕನ್ನಡಿ ಬಾರವು |

ಸಂಚಿತಾರ್ಥದ ದ್ರವ್ಯ ಬಾರದು

ಮುಂಚೆ ಮಾಡಿರೊ ಧರ್ಮವ ||

ಅರ್ಥವ್ಯಾರಿಗೆ ಪುತ್ರರು ಯಾರಿಗೆ

ಮಿತ್ರ ಬಾಂಧವರು ಯಾರಿಗೆ |

ಕರ್ತೃ ಯಮನವರೆಳೆದು ಒಯ್ದಾಗ

ಅರ್ಥಪುತ್ರರು ಕಾಯ್ವರೆ ||

ತಂದು ಬಂದರೆ ತನ್ನ ಪುರುಷನ

ಬಂದಿರಾ ಬಳಲಿದಿರಾ ಎಂಬಳು |

ಒಂದು ದಿವಸ ತಾರದಿದ್ದರೆ

ಹಂದಿನಾಯಿಯಂತೆ ಬೊಗಳುವಳು ||

ಪ್ರಾಣವಲ್ಲಭೆ ತನ್ನ ಪುರುಷನ

ಕಾಣದೆ ನಿಲ್ಲಲಾರಳು |

ಪ್ರಾಣಹೋಗುವ ಸಮಯದಲ್ಲಿ

ಜಾಣೆ ಕರೆದರೆ ಬಾರಳು ||

ಉಂಟು ಕಾಲಕೆ ನಂಟರಿಷ್ಟರು

ಬಂಟರಾಗಿ ಕಾಯ್ದರು |

ಕಂಟಕ ಯಮನವರು ಎಳೆವಾಗ

ನೆಂಟರಿಷ್ಟರು ಬಾರರು ||

ಒಡವೆ ಅರಸಿಗೆ ಒಡಲು ಅಗ್ನಿಗೆ

ಮಡದಿ ಮತ್ತೊಬ್ಬ ಚೆಲುವಗೆ |

ಬಡಿದು ಹೊಡೆದು ಯಮನವರೆಳೆವಾಗ

ಎಡವಿ ಬಿದ್ದಿತು ನಾಲಗೆ ||

ದಿಟ್ಟತನದಲಿ ಪಟ್ಟವಾಳುವ

ಕೃಷ್ಣರಾಯನ ಚರಣವ |

ಮುಟ್ಟಿ ಭಜಿಸಿರೊ ಸಿರಿಪುರಂದರ

ವಿಠಲೇಶನ ಚರಣವ ||